O Hangin!

Ika-12 Linggo ng Karaniwang Panahon B
(June 25, 2006)
Reading I: Job 38:1, 8-11
Responsorial Psalm: 107:23-24, 25-26, 28-29, 30-31
Reading II: 2 Corinthians 5:14-17
Gospel: Mark 4:35-41

Sino nga ba ito? Maging ang hangin at dagat sumusunod sa kanya!

Sa mga mahilig noon manood ng tele-seryeng Encantadia, na naging Etheria, na nagtapos bilang Encantadia: Pag-ibig Hanggang Wakas, naaliw sila sa karakter ni Amihan (Ina Calzado), isa sa mga diwata ng Sang'gres at taga pag-alaga sa Brilyante ng Hangin.

Ina Calzado bilang Amihan

Ang amihan at ang mga mangigisda

Sa meteorolohiya, ang hanging amihan (northeast monsoon) ay dumarating pag malapit na ang pasko, nagdadala ng ginaw, kaya ang awit "Malamig ang simoy ng hangin".

Pero ang amihan ay hanging kaaway ng mga mangingisda. Di tulad ng habagat, ang hanging amihan ay nagdadala ng mga mabibilis na alon at nagiging malakas ang kuryente ng dagat. Mahirap pumalaot at hindi madaling mangisda.

Si Aminan, Bathala, at Aman Sinaya

Sa mitolohiya ng Pilipinas, ang hangin ay nagkatawang diyosa kay Amihan. Bago nalikha ang lupa, naroon na sina Bathala, ang diyos na Langit; si Aman Sinaya, ang diyos na Dagat at si Amihan, ang diyosa ng Hangin. Pasaway itong si Aman Sinaya laging ginagamit ang malalaki niyang alon upang hamakin si Bathala. Sa kanilang sugapaan, nagapi si Aman Sinaya at nabuo ang iba't ibang pulo (ang kapuluan ng Pilipinas). Natapos ang giyera dahil namagitan si Amihan na nag-anyong ibon. Naging magkaibigan ang dalawa.

Si Malakas at si Maganda

Bilang tanda ng kanilang pagkakaibigan, nagpunla si Bathala ng isang buto sa ilalim ng Dagat. Nang lumaki ito, naging kawayan. Umusbong, lumampas sa Dagat at napansin ni Amihan. Nang lapitan nito nakarinig siya ng ingay mula sa loob ng kawayan: "O Amihan! O Amihan! Palabasin mo kami rito." Tinuka ni Amihan ang kawayan at lumabas ang dalawang tao, isang lalaki at isang babae. Pinangalanan niya ang lalaki, "Malakas", at ang babae, "Maganda". Inilipad niya ang mga ito sa mga pulo kung saan ang dalawang unang tao ay nagtayo ng tahanan at dumami ang kanilang lahi.

Si Amihan sa anyong ibon,
at ang paglabas ni Malakas at Maganda

(Mula sa Art Gallery ni Nestor Redondo)

Si Baal at Yam

Hawig nito ang mitolohiya ng Canaan at ng Sinaunang Malapit na Silangan (Ancient Near East). Sa Canaan, mahigit dalawang libong taon bago dumating si Hesus, nakaukit na sa mga tapyas na luwad (clay tablets) ang kwento ng sagupaan ng diyos na Langit na si Baal at ang diyos na Dagat na si Yam. Katulad ni Aman Sinaya, si Yam ang nagdadala ng gulo (chaos). Sa digmaan ni Baal at Yam, nanaig si Baal at nagkaroon ng kaayusan at pagyabong ng mga pananim.

Halimbawa ng tapyas na luwad
kung saan nakaukit ang kasaysayan ni Baal at Yam

Si Marduk at Tiamat

Ganun din ang kasaysayan ng simula ng mundo ayon sa Sinaunang Malapit na Silangan (sa Mesopotamia halimbawa). Nagkaroon ng digmaan si Marduk, ang tanyag na diyos ng mga taga-Babylonia, at si Tiamat, ang diyos ng kailaliman at karagatan. Pinaslang ni Marduk Tiamat sa pamamagitan ng sibat. Nahati ang katawan ni Tiamat--ang isa'y naging langit, at ang kabila'y lupa. Ang kanyang luhaang mga mata ang pinagmulan ng ilog Tigris at Eufrates. Katulad ni Bathala at Baal, nanaig si Marduk at nagkaroon ng kaayusan at tao sa mundo.

Ang digmaan ni Marduk at Tiamat (anyong dragon)
mula sa isang Babylonian cylinder seal

Itutuloy....
Kung gusto mong mapadalhan ng email alert para sa blog na ito, sumulat lang dito sa e-mail: rrandy33@yahoo.com

Tagay -Tayo!

Katulad ng nabanggit sa header sa taas, ang blog na ito ay mga kuro-kuro, ideya, pagninilay, eksegesis ng mga pagbasa tuwing Araw ng Linggo para makatulong sa pagbabasa at pagpapaliwanag nito, baka makatulong din ito sa makabuluhang pakiisa sa liturhiya.

Malimit ang salita ng Diyos ay inihahambing sa pagkain o tinapay (Ezekiel 3:1) o kaya sa ilawan (Salmo 119:105) Kaya sa pagpili ng pangalan nitong blog, naisip ko ang "Pandesal" (pinoy version ng Daily Bread) pero ginagamit na ito. O pwede sanang "Tanglaw", gasgas na rin ito.

Kaya eto na lang: Tagay-Tayo! Medyo bulgar ang pananalita dahil bokabularyo 'to ng mga lasing. Pero nakipag-tagayan din si Hesus (Juan 2:1-3). Napagkamalang pa nga syang lasenggero (Mateo 11:19)! Tsaka, iniimon din ang salita ng Diyos (Juan 4:14).

Kasalan sa Cana

likha ni Giotto (1236-1337)

Okey din kasi kapangalan 'to ng isang tanyag na lungsod sa Cavite, ang Tagaytay kung saan naroon ang Divine Word Seminary, ang paaralan ng mga nagpapakadalubahsa sa teolohiya.

Kung gusto mong malamang bakit pinangalanang "Tagaytay" ang lungsod, pindutin mo 'to.

Ang Taal Lake, tanawin mula Tagaytay City